Views and Critics Over Giving privilege to TTHK, Co.Ltd

មតិ និងការព្រួយបារម្ភជុំវិញការទទួលសិទ្ធិផ្តាច់មុខរបស់ក្រុមហ៊ុនធី ធី អេជ ខេ

ជាទូទៅ ក្រសួងពាណិជ្ជកម្មនៃកម្ពុជាតែងតែផ្តល់ជូនអាជ្ញាប័ណ្ណសំរាប់ក្រុមហ៊ុនណា
ដែលមានបំនងចង់ធ្វើជាអ្នក នាំចូលផ្តាច់មុខនូវផលិតផលអ្វីមួយ។ ទន្ទឹមនឹងនេះ
ផងដែរ កាលពីដើមខែមករាឆ្នាំ២០១០ ក្រុមហ៊ុនធី ធី អេជ ខេដែលមានមូលដ្ឋាន
នៅកម្ពុជាតាំងពីឆ្នាំ១៩៩៣ បានទទួលលិខិតការពារលើកម្មសិទ្ធពាណិជ្ជនាម ក្នុងការ
នាំចូលផ្តាច់មុខរថយន្តតូយ៉ូតា។

“ ដោយសារទទួលជោគជ័យលើគុណភាព និងការបំរើអតិថិជន កាលពីខែមករា
កន្លងមក ក្រុមហ៊ុនយើងខ្ញុំបានទទួលលិខិតការពារលើកម្មសិទ្ធពាណិជ្ជនាម ដែល
ចេញដោយក្រសួងពាណិជ្ជកម្ម។ ” នេះបើតាមប្រសាសន៏លោក កែវ វឌ្ឍនៈ
ប្រធានផ្នែកសេវាអតិថិជនប្រចាំក្រុមហ៊ុន។

ទោះជាយ៉ាងនេះក្តី មានមតិខ្លះបានសំដែងការព្រួយបារម្ភថា ការផ្តល់សិទ្ធិផ្តាច់មុខ
លើយានជំនិះម៉ាកតូយ៉ូតា ហាក់ដូចជាបង្អាក់ការរកស៊ីរបស់អាជីវករដទៃទៀត និង
ទុកឪកាសឪ្យក្រុមហ៊ុនចេះតែតំឡើងថ្លៃដោយស្រេចតែចិត្ត ដោយ ហេតុថាគ្មានដៃគូ
ប្រកួតប្រជែង។

លោក ឃី បូណា អ្នកលក់រថយន្តនៅឃ្លាំងហាក់ ស្រ៊ុនពោលថា ឥលូវនេះយើង
នៅសល់រថយន្តតូយ៉ូតាថ្មីខ្លះដែលនាំចូលមុនពេលក្រុមហ៊ុនធី ធី អេជ ខេទទួល
សិទ្ធផ្តាច់មុខ ដែលរថយន្តទាំងនោះនាំចូលមកពីកោះតៃវ៉ាន់ និងប្រទេសអារ៉ាប់។
លោកបន្ថែមថា ក្រោយពីរថយន្តទាំងនោះលក់អស់ យើងច្បាស់ជាត្រូវបង្ខំចិត្តលក់
រថយន្តតូយ៉ូតាមួយទឹកដើម្បីបំពេញតំរូវការអតិថិជន។

“ ខ្ញុំគិតថា ការឪ្យសិទ្ធិលក់ផ្តាច់មុខទៅក្រុមហ៊ុនមួយ ពុំមែនជាគំនិតល្អឡើយព្រោះថា ទីផ្សារគឺតំរូវឪ្យមានការប្រកួតប្រជែង ហើយការប្រកួតប្រជែងនោះហើយដែលផ្តល់
ផលចំនេញយ៉ាងច្រើនសំរាប់អ្នកប្រើប្រាស់។ ” នេះបើតាមលោក ឃុត ស៊ននិមល
និស្សិតសាកលវិទ្យាល័យភូមិន្ទភ្នំពេញ

ដោយសារតែជីរភាពមានលក្ខណៈធូរធារ ការប្រើប្រាស់រថយន្តសំរាប់ធ្វើដំនើររបស់
ប្រជាជនកម្ពុជា ត្រូវបានមើលឃើញថាមានការកើនឡើងខ្ពស់។ក្នុងនោះ រថយន្ត ម៉ាកតូយ៉តាត្រូវបានទទួលការនិយមខ្លាំងពីសំនាក់មហាជនសំរាប់ប្រើប្រាស់ជាលក្ខណៈ
គ្រួសារ អាជីវកម្ម និងវត្ថុបំនងផ្សេងៗទៀត។

ក្នុងចំនោមម៉ូដែលជាង១៥០ប្រភេទ ដែលត្រូវបានលក់ទូទាំងពិភពលោក មានម៉ូដែល ប្រហែលជាង១០ប៉ុណ្ណោះនៃរថយន្តម៉ាកតូយ៉ូតាដែលដាក់លក់នៅក្នុងប្រទេសកម្ពុជា។
ម៉ូដែលទាំងនោះមានដូចជា កាមរី កូរ៉ូឡា ឡង់គ្រីស័រ វីហ្គូ ប្រាដូ ។ល។ អតិថិជន
អាចរកជាវរថយន្តតូយ៉ូតាជជុស ឬថ្មីនៅតាមហ្គារាសផ្សេងៗ ក៏ដូចជាក្រុមហ៊ុនធី ធី
អេជ ខេ។

បើតាមនិយមន័យសេដ្ឋកិច្ច កាលណាតំរូវការកើនឡើងខ្ពស់ ចំនួននៃការផ្គត់ផ្គង់ក៏កើន
ឡើងផងដែរ។ ហេតុនេះហើយ ទើបសកម្មភាពលក់រថយន្តមានការរីកដុះដាលយ៉ាងខ្លាំង
នាប៉ុន្មានឆ្នាំចុងក្រោយនេះ ដែលមានការប្រកួតប្រជែងរវាងអ្នកលក់រថយន្តជាអាជីវកម្ម
ទាំងខ្នាតតូច ទាំងខ្នាតធំលើរថយន្តថ្មី និងមួយទឹក សំរាប់ជាជំរើសរបស់អ្នកប្រើប្រាស់
ដែលមានជីវភាពធូរធារ ធូរធារល្មម និងមិនសូវធូរធារ។

“ ក្នុងមួយខែ ខ្ញុំអាចលក់រថយន្តបានជាង១០ គ្រឿង ហើយភាគច្រើនជារថយន្តម៉ាក តូយ៉ូតាដែលមានប្រភពដើមនៅសហរដ្ឋអាមេរិក ” នេះបើតាមសំដីលោក ប៊ុន ច័ន្ទកុម្ភៈ
ម្ចាស់ឃ្លាំងលក់រថយន្តមុន្នីវង្ស។

លោក វឌ្ឍនៈ បានបន្ថែមថា ក្រុមហ៊ុនបាននាំចូលរថយន្តតូយ៉ូតាដោយតំរូវតាមកំរិត
ជីវភាពប្រជាជន ស្ថានភាពផ្លូវ ប្រភេទឥន្ធនៈក្នុងស្រុក និងច្បាប់នាំចូលរបស់ស្រុកខ្មែរ។ រថយន្តទាំងនោះត្រូវបាននាំចូលពីប្រទេសថៃ ហើយ អតិថិជននឹងទទួលបានរថយន្ត ១ខែក្រោយពីពួកគាត់កម្មង់ទិញរថយន្តនោះ។

មូលហេតុដែលធ្វើឪ្យរថយន្តតូយ៉ូតាមានកេរ្ត៏ឈ្មោះល្បីល្បាញជាងគេនៅក្នុងប្រទេស
កម្ពុជា ព្រមទាំងសាកលលោកទាំងមូល គឺដោយសារលក្ខណៈពិសេសផ្នែកគុណភាព
សោភណ័ភាព និងការគិតដល់សុវត្ថិភាពជាចំបង។ ក្រៅពីនេះ រថយន្តដែលផលិត
ដំបូងនៅប្រទេសជប៉ុននេះ មានមុខងារច្រើនប្រភេទ ដែលអាចទាក់ទាញអតិថិជន
ឪ្យជាវ ទោះបីជារថយន្តនេះមានតំលៃខ្ពស់ជាងរថយន្តដទៃបន្តិចក៏ដោយ។

គួររំលឹកផងដែរថា ការកើនឡើងនៃចំនួនយានយន្តនៅកម្ពុជា មានការទាក់ទងនឹង
កំនើនសេដ្ឋកិច្ចនាចុងឆ្នាំ២០០៧ និងដើមឆ្នាំ២០០៨។ បើតាមរបាយការណ៏ក្រុមហ៊ុន
ធី ធី អេជ ខេបានបង្ហាញថា អតិថិជនដែលបានជាវរថយន្តពីក្រុមហ៊ុនមានចំនួនទៅ
ដល់ ១០២៦គ្រឿង នាឆ្នាំ២០០៨។ ផ្ទុយទៅវិញ ចំនួននេះបានធ្លាក់ចុះមកត្រឹមតែ
៤៣៧គ្រឿងប៉ុណ្ណោះនាឆ្នាំ២០០៩ ដោយសារវិបតិ្តសេដ្ឋកិច្ចសាកលលោក។

Women's Rights Day

បើគេនិយាយពីទិវាសិទ្ធនារី គេតែងនឹកដល់ថ្ងៃទី៨ មីនា ដែលជាថ្ងៃតំនាងឪ្យការផ្តល់នូវសិទ្ធស្មើគ្នារវាងបុរស និងស្រ្តីនៅលើសកលលោក។ប្រទេសកម្ពុជាក៏មានការប្រារព្ធបុណ្យនេះជារៀងរាល់ឆ្នាំផងដែរក្នុងគោលបំណង
ជួយលើកស្ទួយនិងជំរុញសមត្ថភាពស្រ្តីក្នុងការអភិវឌ្ឍន៏សហគមន៏។

លោកជំទាវ កេត សំអាត ទីប្រឹក្សាជាន់ខ្ពស់ក្រសួងកិច្ចការនារីបានមានប្រសាសន៏ថា កម្ពុជាប្រារព្ធបុណ្យនេះ ដើម្បីរំលឹកដល់ការតស៊ូរបស់នារី និងពលការនីទូទាំងពិភពលោក ដែលបានប្រឹងប្រែងទាមទារឯករាជ្យភាព និងសមភាពលើកិច្ចការងារក្នុងសង្គម។

គួររំលឹងផងដែរថាបុណ្យសិទ្ធនារីឆ្នាំនេះ គឺជាខួបគំរប់ទី៩៩ហើយ ដែលស្រ្តីបានរួចផុតពីការគាបសង្កត់នានា។ ដោយឡែកនៅកម្ពុជា គឺជាឆ្នាំទី១៥ហើយ ក្រោយពីរាជរដ្ឋាភិបាលបានបង្កើតច្បាប់ស្តីពីសិទ្ធិស្រ្តីចំពោះការអប់រំ ការរើសអើង ការប្រកបរបរ ការសំរេចចិត្ត និងច្បាប់ការពារ។

ទោះជាយ៉ាងនេះក្តី ការកេងប្រវញ្ច័ ការរើសអើង និងរំលោភសិទ្ធិស្រ្តី ព្រមទាំងអំពើហឹង្សាក្នុងគ្រួសារ នៅតែមាន ជារឿយៗនៅក្នុងសង្គមគ្រួសារខ្មែរនាពេលបច្ចុប្បន្ន។ ហេតុនេះហើយទើបមានការចូលរួម ពីស្ថាប័នរដ្ឋ មានក្រសួងកិច្ចការនារី និងអង្គការសង្គមស៊ីវិលរួមគ្នាដើម្បីដោះស្រាយបញ្ហាទាំងនេះ។

ជាក់ស្តែងកាលពីថ្ងៃទី៤ មីនា មានការប្រារព្ធតន្រ្តីដ៏ធំអស្ចារ្យមួយ នាពហុកីឡាដ្ឋានជាតិអូឡាំពិកក្រោមពាក្យស្លោកថា រួមគ្នាបង្កើនសក្តានុពលរបស់ស្រ្តី និងយុវវ័យដើម្បីអភិវឌ្ឍសង្គមជាតិ។ តន្រ្តីនេះរំលឹកដល់ការសំរេចបាននូវសមធម៌ដ៏ល្អ ពិនិត្យមើលការអភិវឌ្ឍន៏ និងស្វែងរកឧបសគ្គនានាដែលស្រ្តីកំពុងជួបប្រទះ។

មុនកិច្ចចាប់ផ្តើមកម្មវិធី លោកជំទាវ អ៊ឹង កន្ថាផាវី រដ្ឋមន្រ្តីក្រសួងកិច្ចការនារីបានថ្លែងថា “ តំណែងស្រ្តីបានកើនឡើង ដូចដំនក់ទឹកភ្លៀងមិនដាច់គ្រាប់ នាកំឡុងទស្សវត្យរ៏ចុងក្រោយ។ ប៉ុន្តែដោយសារសុរា គ្រឿងញៀន និងភាពយន្តខ្វះខាត គុណភាព បានធ្វើឪ្យអំពើហឹង្សាក្នុងគ្រួសារ នៅតែស្ថិតក្នុងចំនុចគួរឪ្យព្រួយបារម្ភដដែល។ “

យ៉ាងណាមិញ មានយុវវ័យជាច្រើនបានចូលរួម ដែលភាគច្រើនជាមនុស្សស្រី។ នេះក៏បង្ហាញដែរថា យុវវ័យភាគច្រើន បានយល់ច្បាស់ពីសារសំខាន់នៃសិទ្ធរបស់ពួកគេ ដែលនេះក៏អាចជាផ្លូវកែប្រែកម្ពុជាឪ្យក្លាយជាប្រទេសមួយដែលគ្មាន អំពើហឹង្សា។

“ ខ្ញុំសប្បាយចិត្តពេលនារីត្រូវបានគេទទួលស្គាល់ និងផ្តល់អតិភាពច្រើនក្នុងលក្ខណ្ឌ័ការងារ “ នេះបើតាមកញ្ញា យី ស្រីមុំ បុគ្គលិកក្រុមហ៊ុន Smart Mobile ដែលមានបញ្ជរជិតកន្លែងប្រគំតន្ត្រី។

ចំនែកឯកញ្ញា ទៀក បូរី និស្សិតសាលាវ៉ាន់ដាគណនេយ្យបានសំណូមពរថា ក្រុមបុរសៗមិនគួរមើលងាយស្រ្តីឡើយ ព្រោះស្រ្តីក៏មានសិទ្ធិស្មើ ហើយក៏អាចធ្វើការងារបានដូចបុរសដែរ។ មតិរបស់កញ្ញាបូរី មានលក្ខណៈផ្ទុយពីលោក រស់ ប៉ុន មន្រ្តីស្នងការនគរបាលរាជធានីភ្នំពេញដែលលើកឡើងថា “ ស្រ្តីមានសិទ្ធិ ប៉ុន្តែនាងមិនត្រូវប្រើប្រាស់វាហួសដែន កំនត់ដូចជាក្បត់ផិត ឬលេងល្បែងនោះឡើយ បើមិនដូច្នោះ អំពើហឹង្យាប្រាកដជាកើតមានឡើង។ “

ទិវានារីអន្តរជាតិត្រូវបានកំនត់យកថ្ងៃទី៨ ខែមីនា ក្រោយពីសន្និបាតអន្តរជាតិនារីឆ្នាំ១៩១០ នាប្រទេសដាណឺម៉ាក ទីក្រុងកូបេនហាហ្គេន ដែលកាលនោះមានប្រទេស១៧ចូលរួម។ “ មកទល់ពេលបច្ចុប្បន្ន ប្រទេសអភិវឌ្ឍមួយចំនូន មិនបានប្រារព្ធអ្វីអធឹកអធ័មនោះទេ ដោយហេតុថាសង្គមពួកគេផ្តល់សិទ្ធិដល់ស្រ្តីរួចមកហើយ។ “ លោកជំទាវ កេត សំអាត បន្ថែម

ដោយសារជនគ្រប់រូបជាអ្នកកំនត់វាសនាខ្លួនគេផ្ទាល់ ស្រ្តីគ្រប់រូបគប្បីសង្វាតស្វាធ្យាយធ្វើយ៉ាងណាឪ្យជីវិតខ្លួនមានភាព ស្រស់បំព្រង ពោរពេញទៅដោយសេចក្តីសុខ និងសុភមង្គលដើម្បីជាធនធានមនុស្សដ៏ឆ្នើមសំរាប់អភិវឌ្ឍប្រទេសជាតិ។

“ សូមស្រ្តីទាំងឡាយចូលរួមកសាងសមត្ថភាព ស្វែងរកពត៌មាននានា ហើយកុំបណ្តោយខ្លូនឪ្យធ្លាក់ខ្លូនប្រព្រឹត្តអំពើមិន គប្បីទាំងឡាយ “ លោកជំទាវ អ៊ឹង កន្ថាផាវីបញ្ជាក់។